Məktəblərimiz genişzolaqlı internetə qoşulacaq

İnternetə evdə qoşulmaların sayı artır.

Azərbaycan hökuməti internet istifadəçilərinin sayının xeyli artmasına xidmət edən genişzolaqlı infrastrukturun inkişafına təqribən 0,5 milyard dollar investisiya yatırır.

Day.az xəbər verir ki, bunu rabitə və yüksək texnologiyalar naziri Əli Abbasov ötən gün Dubayda keçirilən Beynəlxalq Telekommunikasiya İttifaqının (ITU) rabitənin inkişafı üzrə VI Ümumdünya “Davamlı inkişaf üçün genişzolaqlı rabitə” konfransında çıxışı zamanı deyib.

Ə.Abbasovun sözlərinə görə, Azərbaycan genişzolaqlı rabitənin inkişafı sahəsində beynəlxalq əməkdaşlığın dərinləşdirilməsi və genişləndirilməsinin tərəfdarıdır:

“Azərbaycanda reallaşdırılan genişzolaqlı internetin inkişafı layihəsi ilk növbədə evdə qoşulmaların sayının artmasına xidmət edir. Bundan başqa, respublikanın ümumtəhsil müəssisələrinin genişzolaqlı internetə qoşulması da prioritet vəzifədir”.

Konfransda genişzolaqlı internetin ən yüksək templə inkişaf etdiyini və onun artımının böyük hissəsi inkişaf edən ölkələrin payına düşdüyünü xüsusilə qeyd ediblər. (Trend)

ANN.Az