Azərbaycan fındığı xarici bazarda bahalaşıb

Azərbaycan fındığının qiymətinin xarici bazarda bahalaşması qeydə alınıb. Bunu  Azərbaycan Fındıq İstehsalçıları və İxracatçıları Assosiasiyasının sədri İsmayıl Orucov deyib.

 

O bildirib ki, buna səbəb dünya fındıq bazarında baş verən proseslərlə əlaqədardır. 

"Dünyada il ərzində 1 milyon 200 min ton qabıqlı fındıq istehsal edilir. Yağıntıların çox olması səbəbindən məhsulun keyfiyyətinin aşağı düşməsi avtomatik olaraq tələb-təklif balansını da pozur. Ona görə də ötən illə müqayisədə bu il dünya bazarında fındığın təxminən 10-15 faiz bahalaşması müşahidə edilir və yaxın zamanlarda qiymətlərdə bir qədər də artım olacağı istisna deyil. Qiymət siyasətinə təsir edən digər amilləri də nəzərə almaq lazımdır. Fındığa rəqib olan quru meyvələrin qiymətində artım yoxdur. Misal üçün, qoz və badamın qiymətlərində kəskin ucuzlaşma müşahidə edilir. Əslində, rəqib məhsulların qiymətləri aşağı olmasaydı, fındığın qiymətində daha çox bahalaşma ola bilərdi. Bu il müəyyən ərazilərdə nisbətən az, bəzi bölgələrdə isə təxminən keçənilki səviyyədə məhsuldarlıq gözlənilir”,- İsmayıl Orucov əlavə edib.

 

2023-cü ilin birinci yarısında Avropa İttifaqı (Aİ) ölkələri Azərbaycandan 25,395 milyon avro dəyərində 4,773 min ton qabığı təmizlənmiş meşə fındığı  idxal edib

 

Azərbaycan dünyada ən böyük fındıq istehsalçısı və ixracatçılarından biridir.