Şəkidə gimnaziya məktəbində 18 sinifdə qızılca halı aşkarlanıb - Rəsmi

Şəki Şəhər İnteqrasiya Təlimli İnternat Tipli Gimnaziyanın  18 sinifində uşaqlar arasında yoluxma halı aşkarlanıb. Bu barədə Səhiyyə Nazirliyinin məlumatında qeyd olunub.  

 

"Şəki Şəhər İnteqrasiya Təlimli İnternat Tipli Gimnaziyanın şagirdləri arasında 2023-cü ilin sentyabr ayının sonlarından başlayaraq qızılca infeksiyasına yoluxma halları baş verib. Belə ki, gimnaziyanin 22 sinifindən 18-də tək-tək yoluxma halları müşahidə olunub. Bu hallar əsasən qızılcaya qarşı vaksinasiyadan kənarda qalmış uşaqlar arasında baş verib.Hazırda gimnaziyada epidemioloji vəziyyət ciddi nəzarət altındadır. Son yoluxma hadisəsi 6 oktyabr 2023-cü il tarixində qeyd edilib. Bu tarixdən etibarən xəstəliyin inkubasiya dövrü tamamlanana qədər (21 gün) ocaqda nəzarət işləri davam etdiriləcək", - məlumatda deyilir. 

 

Bundan əvvəl Elm və TƏhsil Nazirliyi Şəki Şəhər İnteqrasiya Təlimli İnternat Tipli Gimnaziyanın şagidlərinin qızılcaya yoluxması səbəbindən bağlandığını açıqlayıb. 

 

Oktyabrın 25-də Səhiyyə Nazirliyi açıqlama yayaraq vurğulayıb ki, Azərbaycanda qızılcadan peyvənd olunmayan uşaqlar arasında bu xəstəliyin yoluxma halları müşahidə edilib.

 

Nazirlik bildirib ki, Azərbaycanda 2014-cü ildən bu yana qızılcaya yoluxan olmayıb. Bu səbəbdən Ümumdünya Səhiyyə Təşkilatı Azərbaycanı bu xəstəliyə yoluxan ölkələr siyahısından çıxarılıb. 
 
Səhiyyə Nazirliyinin sentyabrda açıqladığı məlumatda Azərbaycanda qızılcaya yoluxanların sayı 24 olduğu açıqlanıb. 


Gülnar Nazimqızı