ABŞ hökuməti Sevinc Vaqifqızını mükafatlandırıb - VİDEO
10.12.2024 13:12
Bazar ertəsi ABŞ hökuməti həbsdə olan jurnalist Sevinc Vaqifqızını dünya üzrə korrupsiya ilə mübarizə sahəsində mükafatlandırılan 10 çempiondan biri elan edib. Bu barədə Turan məlumat yayıb.
"Azərbaycanlı jurnalist Sevinc Vaqifqızı bu gün bizimlə birlikdə olmayan yeganə laureatdır," - ABŞ Dövlət katibi Blinken Dövlət Departamentində keçirilən mükafatlandırma mərasimində bildirib.
Abzas Media-nın baş redaktoru olan Sevinc Vaqifqızı ötən ilin noyabrında Bakıda həbs edilib.
"Bu gün, bir ildən çox keçməsinə baxmayaraq, o, hələ də həbsdədir," - Blinken əlavə edib.
ABŞ Dövlət Departamenti 2021-ci ildə korrupsiya ilə mübarizə aparan şəxsləri tanıtmaq və ABŞ-ın onlara dəstəyini nümayiş etdirmək məqsədi ilə "Korrupsiya ilə Mübarizə Çempionları" mükafatını təsis edib.
Bu ilin laureatları arasında jurnalistlər, insan hüquqları müdafiəçiləri, hakimlər və hətta ciddi institusional dəyişikliklərə nail olan dövlət məmurları da yer alır.
"Biz hesabatlılıq, qanunun aliliyi, şəffaflıq və mətbuat azadlığı uğrunda mübarizə aparan hər kəsi təqdir edirik," - Blinken qeyd edib.
Bu ilin digər laureatları arasında Kolumbiyadan Xorxe Mora Kortes, Nepaldan Matrika Dahal, Albaniyadan Altin Dumanı, Ermənistandan Srbuxi Qalyan, Livandan Karl İrani, Qambiyadan Marr Nyanq, Panamadan Xavyer Enrike Karaballo Salazar, Qazaxıstandan Didar Smaqulov və Uqandadan Cimmi Spayr Ssentoqo da var.
www.anews.az
Facebook
Bizi Facebookda izləyin
Foto
Video
