Milli Məclisdə plastik cərrah mübahisəsi

Azərbaycanda plastik cərrahiyyə ilə bağlı qəbul edilən yeni qərarların mövcud qanunvericiliklə uyğunlaşdırılmalıdır və uzun illər plastik cərrah işləmiş şəxslərin hüquqlarını əllərindən almaq olmaz. Bu barədə Milli Məclisin uyğun komitə iclasında deputat Rəşad Mahmudov bildirib. 

"Hazırda qüvvədə olan qaydalara əsasən, bir şəxs ixtisas imtahanından keçməsə belə, əgər beş il ərzində müvafiq tibb müəssisəsində fəaliyyət göstəribsə, sertifikat ala bilir. Bu təcrübə Nazirlər Kabinetinin 2019-cu ildə təsdiqlədiyi qərarlarda da əks olunub. Yeni islahatlar aparılarkən, əvvəllər qanunvericiliyə əsaslanaraq hüquq qazanmış şəxslərin mövcud hüquqları nəzərə alınmalıdır. Əks təqdirdə, bu, sosial ədalət prinsiplərinə zidd suallar doğura bilər",  -  Mahmudov vurğulayıb. 

O deyib ki,  xüsusilə Azərbaycanın bölgələrində  müəyyən ixtisaslar üzrə, məsələn, kardioloq və nefroloq kimi mütəxəssislərin çatışmazlığı şəraitində uzun illər fəaliyyət göstərən həkimlərin hüquqlarının qorunması vacibdir. 

"Səhiyyə qanunvericiliyinin yenilənməsi zamanı yalnız ayrı-ayrı maddələrə toxunmaqla kifayətlənməyib, bütövlükdə mövcud və yeni reallıqların uyğunlaşdırılmasına çalışmalıdır.  Bu yanaşma ölkədə son illər həyata keçirilən səhiyyə islahatlarının daha yüksək səviyyədə reallaşdırılmasına töhfə verə bilər",   - millət vəkili deyib. 
 

Deputat Məlahət İbrahimqızı da bildirib ki, qanunverivilikdə qəbul olunan yeni qanunlar köhnə qərarlara şamil olunmamalıdır.

"Mənə plastik cərrahlar müraciət ediblər. Onlar bildirirlər ki, 15-20 il işləməsinə baxmayaraq fəaliyyətlərinə xitam verilib. Qanunvericilikdə belə bir maddə var ki, qanun keçmişdə qəbul olunan qərarlara şamil olunmur",- deputat deyib.

Gülnar Nazimqızı