BDYPİ-dən həftəsonu səfərləri öncəsi sürücülərə xəbərdarlıq

Baş Dövlət Yol Polisi İdarəsi (BDYPİ) həftəsonu səfərlərə çıxacaq sürücülərə xəbərdarlıq edib.

Məlumatda bildirilir ki, paytaxt və digər şəhər-rayon sakinlərinin bölgələrə səfərlərinin artması avtomobil yollarında nəqliyyat axınının yüksəlməsinə səbəb olur. Bu səbəbdən BDYPİ respublika yollarında təhlükəsizliyin təmin olunması məqsədilə nəzarət-profilaktik tədbirləri gücləndirib və patrul xidmətini intensivləşdirib.

Sürücülərdən aşağıdakı tövsiyələrə əməl etmələri xahiş olunur:

Mənzil başına təhlükəsiz çatmaq üçün nəqliyyat vasitələrinin texniki sazlığını əvvəlcədən yoxlamaq, nasaz avtomobillərlə yola çıxmamaq, sürət həddinə, ötmə və manevretmə zamanı təhlükəsizlik qaydalarına ciddi əməl etmək, yol və hava şəraitini nəzərə almaq tövsiyə olunur.

Eyni zamanda uzun məsafəli səfərlərdə fasilələrlə hərəkət etməli, yorğun və ya yuxusuz halda sükan arxasına əyləşməməli, diqqəti yayındıran hərəkətlərdən çəkinmək vacib sayılır.