Həbsdəki hakimə güzəşt edildi – cəzası 9 ildən 6 ilə endirildi

Rüşvət müqabilində qanunsuz qərardad çıxardığı üçün məhkum edilən keçmiş hakim İlyas Mahmudovun cəzası azaldılıb.

“Qafqazinfo”nun məlumatına görə, bu barədə qərarı Ali Məhkəmə çıxarıb. Keçmiş hakimin kassasiya şikayəti qismən təmin edilib və onun cəzası 9 ildən 6 ilə endirilib.

İlyas Mahmudov 2008–2019-cu illərdə Sumqayıt Şəhər Məhkəməsinin hakimi vəzifəsində çalışıb. O, 2022-ci ildə Baş Prokuror yanında Korrupsiyaya qarşı Mübarizə Baş İdarəsi tərəfindən həbs edilmişdi.

Mahmudova qarşı Cinayət Məcəlləsinin 295.1 (bilə-bilə ədalətsiz qərar çıxarma), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2 (təkrar rüşvət alma) və 313-cü (vəzifə saxtakarlığı) maddələri ilə ittiham irəli sürülüb.

Sumqayıt Ağır Cinayətlər Məhkəməsinin hökmü ilə o, 9 il müddətinə azadlıqdan məhrum edilmişdi.