Gələn il sosialyönümlü xərclər artırılacaq

Azərbaycan 2026-cı ildə sosialyönlü xərclərin payını əhəmiyyətli dərəcədə artıracaq. Bunu maliyyə naziri Sahil Babayev parlamentdə dövlət büdcəsi layihəsinin müzakirəsi zamanı bildirib.

Nazirin sözlərinə görə, 2026-cı ildə dövlət büdcəsi xərclərinin 41%-i, cari xərclərin isə 68%-i — ümumilikdə 17,1 milyard manat — sosial sahəyə yönəldiləcək. Bu, 2024-cü ilin icra göstəricisi ilə müqayisədə 2,5 milyard manat və ya 17% çoxdur.

Babayev həmçinin vurğulayıb ki, orta müddətli büdcə dövrü ərzində (2022–2026) sosial xərclər 5,6 milyard manat və ya 48% artacaq.

Nazir qeyd edib ki, 2026-cı ildə sosialyönlü xərclər dövlət büdcəsinin əsas prioritetlərindən biri olaraq qalacaq və əhalinin sosial təminatının gücləndirilməsi istiqamətində artımlar davam etdiriləcək.

Gülnar Nazimqızı