TƏBİB partlayışda yaralananların vəziyyətini açıqlayıb

Noyabrın 24-də Nərimanov rayonunda baş verən partlayışda zərərçəkənlərdən birinə termiki yanıq, daha dörd nəfərə isə (bir kişi və üç qadın) bədənin müxtəlif nahiyələrinin müştərək travmaları diaqnozu qoyulub. Bu barədə TƏBİB-dən bildirilib. 

Xəsarət alanlardan dördünə ilkin tibbi yardım göstərildikdən sonra onlar ambulator müalicə üçün evə buraxılıb.

Bir nəfər isə vəziyyətinə uyğun olaraq digər tibb müəssisəsinə yönləndirilib.

Hadisə dünən Əhməd Rəcəbli küçəsində yerləşən obyektlərdən birində baş verib. Partlayışın səbəbləri araşdırılır.