Əmək Məcəlləsinə distant iş anlayışı daxil edilir

Azərbaycanda əmək qanunvericiliyinə “məsafədən (distant) iş” anlayışının əlavə edilməsi təklif olunur. Layihə Milli Məclisin Regional məsələlər komitəsinin bugünkü iclasında müzakirə edilib.

Təklifə əsasən, distant işin hüquqi çərçivəsinin formalaşdırılması və işçilərin əmək funksiyalarını məsafədən yerinə yetirməsi üçün əsasların müəyyənləşdirilməsi məqsədilə Əmək Məcəlləsinin 3-cü maddəsinə yeni anlayış daxil edilir.

Sənəddə qeyd olunur ki, Əmək Məcəlləsi işəgötürənin xammalından və istehsal vasitələrindən istifadə etməklə işini evdən və ya digər məsafəli üsulla yerinə yetirən işçilərə də şamil olunacaq. Bu dəyişikliklə distant işin hüquqi statusu rəsmiləşdirilmiş olacaq.