Azərbaycanda aksiz markasız tütün qaçaqmalçılığı ilə bağlı sabiq sərhədçi saxlanılıb

Baş Prokuror yanında Korrupsiyaya qarşı Mübarizə Baş İdarəsi Azərbaycanda aksiz markasız tütün məmulatlarının qaçaqmalçılığı ilə bağlı daha bir nəfəri saxlayıb. Bu barədə apa məlumat yayıb

Polkovnik-leytenant Zaur Gülməmmədov, Dövlət Sərhəd Xidmətinin Sahil Mühafizəsinin sabiq şöbə rəisi istintaqa cəlb olunub.

Onun barəsində qətimkan tədbirinin seçilməsi üçün məhkəməyə təqdimat göndərilib. İş üzrə digər 20-dən çox şəxs, o cümlədən Dövlət Gömrük Komitəsi əməkdaşları və liman rəhbərləri də istintaqa cəlb olunub. Onlara qarşı müvafiq Cinayət Məcəlləsinin qaçaqmalçılıq və vəzifə səlahiyyətlərindən sui-istifadə maddələri ilə ittihamlar irəli sürülüb.

İbtidai istintaqın məlumatına görə, həmin şəxslər Birləşmiş Ərəb Əmirlikləri və İran İslam Respublikasından 5,4 milyon manatdan artıq dəyərdə aksiz markası ilə markalanmalı tütün məmulatlarını belə marka olmadan ölkəyə gətirməkdə şübhəli bilinir. Baş Prokurorluq qeyd edir ki, istintaq-əməliyyat tədbirləri davam etdirilir və cinayətkar birliyin digər üzvlərinin məsuliyyətə cəlb olunması istiqamətində iş aparılır.