Bir gündə 78 cinayətin açılması təmin edilib, 133 nəfər saxlanılıb – DİN

Azərbaycan polis əməkdaşları fevralın 3-də ölkə ərazisində qeydə alınmış ümumilikdə 78 cinayətin açılmasını təmin edib. Bu barədə Daxili İşlər Nazirliyinin (DİN) Mətbuat Xidməti məlumat yayıb.

Nazirliyin məlumatına görə, həmin gün ərzində 63 yeni qeydə alınmış, eləcə də əvvəlki dövrlərdən bağlı qalan 15 cinayətin üstü açılıb.

DİN bildirib ki, həyata keçirilən əməliyyat-axtarış tədbirləri nəticəsində axtarışda olan ümumilikdə 133 nəfər saxlanılaraq aidiyyəti üzrə təhvil verilib. Saxlanılan şəxslərdən 100-ü borclu şəxs qismində axtarışda olub.

Hesabat dövründə narkotiklərlə əlaqəli 35 fakt aşkarlanıb. Bundan əlavə, qanunsuz saxlanılan silah-sursatın götürülməsi və aşkarlanması ilə bağlı 10 fakt qeydə alınıb.

Nazirlikdən bildirilib ki, cinayət törətməkdə şübhəli bilinən 62 nəfər polis əməkdaşları tərəfindən saxlanılıb.

DİN qeyd edib ki, ictimai asayişin və təhlükəsizliyin təmin olunması məqsədilə ölkə ərazisində profilaktik və əməliyyat tədbirləri davam etdirilir.

Gülnar