Polis valideynlərə çağırış edib -VİDEO

Azərbaycan Daxili İşlər Nazirliyi uşaqlara qarşı ailə-məişət zorakılığı da daxil olmaqla cinayətlərin qarşısının alınması məqsədilə aidiyyəti qurumlarla birgə profilaktik tədbirləri davam etdirir.

Nazirliyin Mətbuat Xidmətindən bildirilib ki, valideynlərin azyaşlıların sağlamlığına və davranışına nəzarəti həm hüquqi, həm də mənəvi öhdəlikdir. Uşaqların nəzarətsiz qalması fiziki təhlükələr, zərərli mühit və cinayət riskləri ilə üzləşmələrinə səbəb ola bilər.

Qurum qeyd edib ki, müasir dövrdə risklər yalnız fiziki mühitlə məhdudlaşmır, sosial şəbəkələr və rəqəmsal platformalar da valideyn nəzarətini zəruri edir.

Məlumata görə, polis əməkdaşları maarifləndirici söhbətlər, tövsiyələr və preventiv tədbirlər vasitəsilə uşaqların hüquqlarının qorunmasını təmin etməyə çalışır. Məqsədin cəzalandırmaq deyil, risklərin qarşısını almaq olduğu vurğulanıb.

Nazirlik valideynləri övladlarının gündəlik fəaliyyəti və rəqəmsal mühitdə davranışına diqqət yetirməyə, məktəb və ictimai mühitlə əlaqəni gücləndirməyə çağırıb.