Ombudsman “Məktəbli avtobusları” xidmətinin ödənişinə yenidən baxılmasını təklif edib

Azərbaycan Ombudsmanı Milli Məclisdə çıxışı zamanı şagirdlərin təhsil müəssisələrinə gediş-gəlişinin asanlaşdırılması məqsədilə Bakıda tətbiq olunan “Məktəbli avtobusları” pilot layihəsinin genişləndirilməsi fonunda xidmət haqqına yenidən baxılmasını təklif edib.

Təklifə əsasən, növbəti tədris ilindən layihənin daha geniş tətbiqi planlaşdırıldığı nəzərə alınaraq, xidmətlə bağlı ödəniş məbləği ölkə üzrə yaşayış minimumu göstəricisi əsas götürülməklə yenidən müəyyən edilməlidir.

Ombudsman hesab edir ki, bu addım ailələrin sosial yükünün azaldılmasına və təhsilə əlçatanlığın artırılmasına töhfə verə bilər.

Oktyabrın 1-dən etibarən Bakıda məktəblilərin daşınması məqsədilə həyata keçirilən “2school” layihəsinin icrasına başlanılıb. Pilot mərhələdə layihə 8 dövlət və 3 özəl məktəb olmaqla ümumilikdə 11 təhsil müəssisəsini əhatə edir.

Layihə çərçivəsində şagirdlərin məktəbə və evə rahat və təhlükəsiz şəkildə daşınması nəzərdə tutulur. Daşıma xidməti aylıq abunəlik əsasında təşkil olunur və qiymətlər məsafəyə görə dəyişir. İlkin mərhələdə abunə haqqı 100 manatdan başlayır. Təxminən 10 km məsafə üçün ödəniş məbləği 2 tərəfli 240 manat təşkil edir. 

Gülnar Nazimqızı