Belçika və Niderland səfirləri XİN-ə çağırılıb

Belçika və Niderlandın Azərbaycandakı səfirləri - Julyen de Frepon və Marian de Jonq - Xarici İşlər Nazirliyinə çağırılıb. Bu barədə Azərbaycan Xarici İşlər Nazirliyi məlumat yayıb.

Məlumata görə, görüşlər zamanı 16 aprel 2026-cı ildə Belçika və Niderland parlamentləri tərəfindən qəbul edilmiş sənədlərə qarşı kəskin etiraz bildirilib. XİN bu sənədləri Azərbaycanın suverenliyi və ərazi bütövlüyünə, həmçinin Azərbaycan-Ermənistan sülh prosesinə zərbə kimi qiymətləndirib.

Qeyd olunub ki, sənədlər “yalan və əsassız iddialara” əsaslanır və anti-Azərbaycan mövqeyi əks etdirir. Nazirlik bu yanaşmanı beynəlxalq hüququn pozulması və daxili işlərə müdaxilə kimi dəyərləndirib.

Görüşlərdə Azərbaycanın suveren əraziləri ilə bağlı istinadlar, Ermənistanın ərazi bütövlüyünün pozulması iddiaları və erməni əsilli şəxslərlə bağlı ittihamlar qəti şəkildə rədd edilib.

XİN həmçinin vurğulayıb ki, sənədlərin qəbulu Azərbaycan və Ermənistan parlament spikerləri arasında son görüşlə eyni vaxta təsadüf etməsi fonunda “paradoksal” xarakter daşıyır.

Azərbaycan tərəfi Belçika və Niderlandı parlamentlərində anti-Azərbaycan təşəbbüslərin ikitərəfli münasibətlərə mənfi təsirinin qarşısını almaq üçün tədbirlər görməyə çağırıb.