Azərbaycanda suvarılan sahələrin iki dəfədən çox artırılması hədəfləyir

İxtisaslaşmış rayonlarda buğda məhsuldarlığının hazırkı 4 tondan 5 tona çatdırılması hədəflənir. Bunu Aqrar Tədqiqatlar Mərkəzinin direktoru Rəşad Hüseynov Milli Məclisdə çıxışı zamanı bildirib.

Onun sözlərinə görə, bu, istehsal həcminin təxminən 20% artmasına və ölkənin özünütəminetmə səviyyəsinin yüksəlməsinə imkan verəcək.

Hüseynov qeyd edib ki, bu məqsədlə yeni subsidiya mexanizmlərinin tətbiqi nəzərdə tutulur.

Müasir suvarma sistemlərinin quraşdırılmasının dəstəklənməsi davam etdiriləcək, mexanizm daha da təkmilləşdiriləcək.

“Lazer mala tətbiqini düşünürük. Bu, torpağın hamarlanması işlərinin yaxşılaşdırılmasını nəzərdə tutur və məhsuldarlığa birbaşa ciddi təsir göstərir. Lazer mala tətbiq edən fermerlərə əlavə subsidiyaların verilməsi nəzərdə tutulur”, - Hüseynov bildirib.

Onun sözlərinə görə, pambıqçılıq sahəsində də məhsuldarlığın artırılması əsas hədəflərdəndir. İxtisaslaşmış rayonlarda pambıq məhsuldarlığının hazırkı 36 sentnerdən 50 sentnerə çatdırılması planlaşdırılır.

Hüseynov bildirib ki, ilk dəfə pambıq mahlıcı və ipliyi üçün məhsul subsidiyasının tətbiqi nəzərdə tutulur. Bu mexanizm pambıq emalı sənayesinin inkişafını təşviq edəcək.

ATM direktorunun sözlərinə görə, pambıq emalı üzrə iki yeni müəssisənin yaradılması da planlaşdırılır və bu istiqamətdə artıq müraciətlər var.

Rəşad Hüseynov əlavə edib ki, ölkədə müasir suvarma sistemləri ilə təminatın yaxşılaşdırılması əsas prioritetlərdəndir. Hazırda 130 min hektar sahədə tətbiq olunan müasir suvarma sistemlərinin 300 min hektara çatdırılması hədəflənir.

O qeyd edib ki, müasir suvarma tətbiq edilən buğda sahələrində məhsuldarlıq 5 tona və daha yüksək səviyyəyə qalxa bilir.

Bundan başqa, torpaqların parçalanmasının qarşısını almaq üçün pilot konsolidasiya layihəsinin həyata keçirilməsi nəzərdə tutulur. Layihə ilkin mərhələdə Qəbələ və Salyan rayonlarında 20 min hektar sahəni əhatə edəcək.

Gülnar Nazimqızı