Nəqliyyat vasitələrinə qanunsuz müdaxilə edən 196 sürücü saxlanıldı

Azərbaycanda bəzi sürücülərin nəqliyyat vasitələrinin konstruksiyasına qanunsuz müdaxilə edərək əlavə işıq cihazları quraşdırması və normativ tələblərə cavab verməyən işıq avadanlıqlarından istifadə etməsi halları müşahidə olunur.Bu barədə Azərbaycan Daxili İşlər Nazirliyi məlumat yayıb.

Nazirlik bildirib ki, avtomobillərin işıq sistemlərinə qanunsuz müdaxilə qarşıdan gələn nəqliyyat vasitələrinin sürücülərinin görmə qabiliyyətini məhdudlaşdırır, diqqətin yayınmasına səbəb olur və ağır yol-nəqliyyat hadisələri riskini artırır.

Məlumata görə, Sumqayıt Şəhər Polis İdarəsinin Dövlət Yol Polisi Şöbəsi tərəfindən keçirilən profilaktik tədbirlər zamanı bu qayda pozuntularına yol verən sürücülər müəyyən edilərək barələrində inzibati protokollar tərtib olunur. Sosial şəbəkələrdə bu cür qanunsuz hərəkətləri paylaşan sürücülərin də məsuliyyətə cəlb edildiyi bildirilib.

Cari ildə Sumqayıtda bu istiqamətdə keçirilən tədbirlər nəticəsində 196 sürücü barəsində inzibati protokol tərtib edilib.

DİN sürücüləri yol hərəkəti təhlükəsizliyinin təmin edilməsi məqsədilə nəqliyyat vasitələrində işıq cihazlarından istifadəyə dair müəyyən edilmiş tələblərə ciddi əməl etməyə çağırıb və bildirib ki, nəzarət və profilaktik tədbirlər davam etdiriləcək.