AEM: İyunda 68 aptek yoxlanılıb, 38 qutu dərman satışdan çıxarılıb

İyunda Səhiyyə Nazirliyinin Analitik Ekspertiza Mərkəzi (AEM) ölkə üzrə 68 aptekdə yoxlama aparıb, nəticədə 10 aptekdə nöqsanlar aşkarlanıb.

AEM-in yaydığı məlumata görə, yoxlamalardan 56-sı planlı, 12-si isə plandankənar olub.

Bildirilib ki, yoxlamaların 58-i Bakı şəhərində, 10-u isə respublikanın digər şəhər və rayonlarında yerləşən apteklərdə keçirilib.

Yoxlamaların nəticələrinə əsasən, 10 aptekdə müxtəlif pozuntular müəyyən edilib. Saxlanma şəraiti ilə bağlı tələblərin pozulmasına görə 11 adda, ümumilikdə 38 qutu dərman vasitəsi satışdan kənarlaşdırılıb.

Aşkarlanmış qanun pozuntuları ilə əlaqədar İnzibati Xətalar Məcəlləsinin müvafiq maddələrinə uyğun olaraq 9 inzibati protokol tərtib edilib.