Öpüşmə və evlilik təklifi edən cütlük həbs olunub

Rusiyalı alpinistlər Angela Nikolau və İvan Birkus ABŞ-ın Nyu-York şəhərində yerləşən Empire State binasının qülləsinə icazəsiz dırmaşaraq sülh çağırışı əks olunan banner açıblar, daha sonra isə polis tərəfindən saxlanılıblar.

Cütlük 443 metr hündürlükdə yerləşən antenaya qalxaraq üzərində "Sevginin gücü güc sevgisinə qalib gələndə dünya sülhü tanıyacaq" sözləri yazılmış banner nümayiş etdirib.

Sosial şəbəkələrdə yayılan görüntülərdə təhlükəsizlik kəmərindən istifadə etməyən alpinistlərin antenanın dar platformasında dayandıqları, bir-birlərini öpdükləri və daha sonra nişanlandıqları görünür.

Hadisədən sonra cütlük hüquq-mühafizə orqanları tərəfindən saxlanılıb. Onlara qarşı irəli sürülən ittihamlar barədə rəsmi məlumat açıqlanmayıb.

Angela Nikolau və İvan Birkus yüksək binalara və digər hündür tikililərə icazəsiz dırmaşmaları ilə tanınırlar. Onların fəaliyyəti 2024-cü ildə yayımlanan "Skywalkers: A Love Story" adlı Netflix sənədli filminin mövzusu olub. ABŞ-da hündür binalara icazəsiz daxil olmaq və onlara dırmaşmaq təhlükəsizlik qaydalarının pozulması hesab edilir və inzibati və ya cinayət məsuliyyəti yarada bilər.

Gülnar Nazimqızı