Binədə iki avtobus toqquşdu: 22 nəfər xəstəxanaya yerləşdirildi

Bakının Xəzər rayonu, Binə qəsəbəsində iki sərnişin avtobusunun toqquşması nəticəsində 22 nəfər müxtəlif dərəcəli xəsarətlər alaraq xəstəxanaya yerləşdirilib.

160 nömrəli marşrut xətti üzrə hərəkət edən "ISUZU" markalı avtobusla qəsəbə ərazisində "Hyundai" markalı avtobus toqquşub.

TƏBİB-in məlumatına əsasən, qəza nəticəsində 13 nəfər (7 kişi, 6 qadın) Sabunçu Tibb Mərkəzinə, 9 kişi isə Kliniki Tibbi Mərkəzə hospitalizasiya edilib.

Kliniki Tibbi Mərkəzə çatdırılan şəxslərə bədənin müxtəlif nahiyələrinin müştərək travmaları diaqnozu qoyulub. Onlara zəruri tibbi yardım göstərilib və vəziyyətləri stabil olduğundan müalicələri Təcili tibbi yardım şöbəsində davam etdirilir.

Sabunçu Tibb Mərkəzində isə yaralılara baş, bədən və ətrafların travmaları, eləcə də sınıqlar diaqnozu ilə tibbi yardım göstərilib.

Yaralılardan 1972-ci il təvəllüdlü bir qadının vəziyyəti orta ağır qiymətləndirilir və onun müalicəsi Reanimasiya şöbəsində davam etdirilir. Digər 12 nəfərin vəziyyəti qənaətbəxş olduğundan ambulator müalicə üçün evə buraxılıb.