İrandan Azərbaycana gətirilən narkotiki satmaq istəyən şəxslər saxlanılıb

Bakının Sabunçu rayonunda polis əməkdaşlarının keçirdiyi əməliyyat-axtarış tədbirləri nəticəsində qanunsuz narkotik dövriyyəsi ilə məşğul olan şəxslər saxlanılıb.

Daxili İşlər Nazirliyinin (DİN) məlumatına görə, birinci əməliyyat zamanı narkokuryerlikdə şübhəli bilinən, əvvəllər məhkum olunmuş Sənan Mirzəyev və onun qadın tanışı tutulub. Onlardan ümumilikdə 22 kiloqram 540 qram marixuana aşkarlanıb. Araşdırmalarla müəyyən edilib ki, dəstə üzvləri İrandan Füzuli rayonuna pilotsuz uçuş aparatı (PUA) vasitəsilə göndərilən narkotik vasitələri götürərək paytaxt ərazisində çatdırmağı planlaşdırıblar.

Sabunçu RPİ əməkdaşlarının Bakıxanov qəsəbəsində keçirdiyi digər əməliyyat zamanı isə əvvəllər məhkum olunmuş Valid Qurbanov saxlanılıb. Ondan 7 kiloqrama yaxın marixuana götürülüb.

Faktlarla bağlı cinayət işləri başlanılıb. Qeyd olunub ki, cari ilin əvvəlindən Sabunçu rayonu üzrə keçirilən əməliyyatlarda ümumilikdə 281 kiloqram narkotik vasitə dövriyyədən çıxarılıb.