Samuxda qarayara diaqnozu təsdiqlənib

Samux rayonunda qarayara xəstəliyinə yoluxma halı qeydə alınıb, xəstə heyvanla təmasda olan 9 nəfər Gəncədə xəstəxananın yoluxucu xəstəliklər şöbəsində izolyasiya edilib. Bu barədə Səhiyyə Nazirliyi, Qida Təhlükəsizliyi Agentliyi (AQTA) və Tibbi Ərazi Bölmələrini İdarəetmə Birliyi (TƏBİB) birgə məlumat yayıb.

İlkin epidemioloji araşdırma zamanı xəstəliyə şübhəli bilinən şəxslərin iribuynuzlu heyvanlarla təmasda olduğu müəyyənləşdirilib. İlk şübhəli şəxsdən götürülmüş nümunənin laborator müayinəsi nəticəsində qarayara diaqnozu təsdiqlənib.

Məlumata görə, xəstə heyvanla təmasda olan 9 nəfər aşkarlanaraq Abbas Səhhət adına Gəncə Şəhər Birləşmiş Xəstəxanasının yoluxucu xəstəliklər şöbəsində izolyasiya olunub. Onlardan laborator müayinə üçün nümunələr götürülərək Şəmkir Regional Xüsusi Təhlükəli İnfeksiyalara Nəzarət Mərkəzinə göndərilib.

Hazırda xəstə şəxslərlə təmasda olan digər insanlar müəyyənləşdirilir və tibbi müşahidəyə cəlb olunur. Dəri yarası olan şəxslərdən də laborator müayinə üçün nümunələr götürülür.

Aidiyyəti qurumlar bildiriblər ki, hazırda əhali arasında xəstəliyin yayılması müşahidə edilmir və vətəndaşların narahatlığına əsas yoxdur.