Azərbaycanda onlayn qumar dəstəsinin rəhbəri saxlanılıb

Azərbaycanda xaricdən idarə olunan qanunsuz onlayn qumar oyunlarının təşkili ilə məşğul olan mütəşəkkil dəstənin rəhbəri və digər üzvləri saxlanılıb. 

Daxili İşlər Nazirliyinin (DİN) məlumatına görə, Kibercinayətkarlıqla Mübarizə Baş İdarəsinin Gürcüstanın hüquq-mühafizə orqanları ilə birgə keçirdiyi əməliyyat nəticəsində axtarışda olan dəstənin rəhbəri Əliyev Anar İslam oğlu (“Anar007”) Gürcüstanda saxlanılaraq Azərbaycana gətirilib.

İstintaqla müəyyən edilib ki, A.Əliyev mütəşəkkil dəstə yaradaraq xaricdə təşkil etdiyi qanunsuz mərc və kazino oyunlarına Azərbaycan vətəndaşlarını cəlb edib. Dəstə üzvlərinin Tbilisi və digər şəhərlərdə kirayələnmiş evlərdə onlayn kazino oyunlarını idarə etdiyi bildirilir.

Əməliyyat zamanı dəstənin digər üzvləri Əşrəf Həsənzadə, Seymur Nurullayev, Etibar Sultanov, Rəşad Rzazadə, Şərqin Əliyev və Anar Surac oğlu Əliyev də saxlanılıb.

DİN-in məlumatına görə, saxlanılan şəxslər dəstə rəhbərinin tapşırığı ilə yerli mobil operatorların nömrələri, bank kartları və digər texniki vasitələrlə onlayn kazino fəaliyyətini təmin ediblər. Qanunsuz qumar oyunlarından əldə olunan vəsaitlərin nağdlaşdırılaraq kriptovalyuta formasında A.Əliyevin hesablarına köçürüldüyü müəyyən edilib.

İstintaq zamanı qanunsuz əldə olunan vəsaitlərin bir hissəsinin daşınar və daşınmaz əmlak alınması yolu ilə leqallaşdırıldığı da müəyyənləşdirilib. Saxlanılan şəxslərdən elektron daşıyıcılar, bank kartları və digər maddi sübutlar götürülüb.

Şübhəli şəxslərə ittiham elan edilərək cinayət məsuliyyətinə cəlb olunublar. Məhkəmənin qərarı ilə Anar Əliyev və Şərqin Əliyev barəsində həbs qətimkan tədbiri seçilib.

Digər şəxslərlə bağlı əməliyyat-istintaq tədbirləri davam etdirilir.