Küləkdə 2 qadın xəsarət alaraq yıxılıb - SN

Güclü külək nəticəsində iki qadın xəsarət alaraq xəstəxanaya müraciət edib. Bu barədə Səhiyyə Nazirliyindən bildirilib.

Zərərçəkənlərə tibbi yardım göstərildikdən sonra ambulator müalicə üçün evə buraxılıblar.

Məlumata görə, sentyabrın 17-də saat 20:20-də 1952-ci il təvəllüdlü qadın güclü külək səbəbindən yıxılaraq xəsarət alıb. Ona sağ pəncənin IV daraq sümüyünün sınığı diaqnozu qoyulub.

Saat 20:40-da isə 1987-ci il təvəllüdlü qadın güclü küləyin təsiri ilə qapının hərəkət etməsi nəticəsində əlindən xəsarət alıb. Tibbi müayinə zamanı onun sol əlinin 3–4-cü barmaqlarında kəsilmiş yara aşkarlanıb.

Hər iki şəxs Səhiyyə Nazirliyinin Elmi-Tədqiqat Travmatologiya və Ortopediya İnstitutuna hospitalizasiya olunub. Onların vəziyyəti qənaətbəxş qiymətləndirilib və müvafiq tibbi yardım göstərildikdən sonra evə buraxılıblar.

Mütəxəssislər güclü külək zamanı vətəndaşları ehtiyatlı olmağa, mümkün qədər açıq ərazilərdə, ağacların, reklam konstruksiyalarının və digər təhlükə yarada biləcək obyektlərin yaxınlığında dayanmamağa çağırıblar.