Azərbaycanda oktyabrın ilk günləri hava qeyri-sabit keçəcək

Oktyabrın ilk günlərində Azərbaycanda hava şəraitinin qeyri-sabit keçəcəyi, fasilələrlə yağış yağacağı gözlənilir.

Milli Hidrometeorologiya Xidmətindən bildirilib ki, oktyabrın 1-i gündüz şimal və qərb rayonlarından başlayaraq 5-dək bəzi yerlərdə yağış leysan xarakterli, intensiv və güclü olacaq.

Naxçıvan Muxtar Respublikası, Qarabağ və Şərqi Zəngəzur, Qazax-Gəncə, Balakən-Şəki, Mərkəzi Aran, Quba-Qusar və Dağlıq Şirvan bölgələrinin bəzi rayonlarında şimşək çaxacağı, dolu düşəcəyi, yüksək dağlıq ərazilərdə isə qar yağacağı ehtimal olunur.

Yağıntılarla əlaqədar çaylarda sululuğun artacağı, Böyük və Kiçik Qafqazın, eləcə də Lənkəran-Astara bölgəsinin bəzi çaylarından qısamüddətli daşqın və sel keçəcəyi gözlənilir.

Oktyabrın 2-3-də ölkənin bəzi yerlərində qərb küləyinin arabir güclənəcəyi proqnozlaşdırılır.

Qeyri-sabit hava şəraiti ilə əlaqədar havanın temperaturunun əvvəlki günlərlə müqayisədə 5-8 dərəcə aşağı düşəcəyi bildirilir.