Qarabağda itkin düşmüş 328 şəxsin kimliyi müəyyənləşdirilib

Birinci Qarabağ müharibəsində itkin düşmüş hesab edilən 328 şəxsin kimliyi məhkəmə-molekulyar genetik ekspertiza vasitəsilə müəyyənləşdirilib. Bunu Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyinin direktoru Ədalət Həsənov “İtkin düşmüş şəxslər üzrə Bakı Dialoqu çərçivəsində IV Beynəlxalq Konfrans”ın ikinci günündə keçirilən panel sessiyada bildirib.

Həsənovun sözlərinə görə, Qarabağın işğaldan azad edilmiş ərazilərindən Birliyə indiyədək itkin düşmüş 913 şəxsə aid olduğu ehtimal edilən meyit qalıqları daxil olub.

O bildirib ki, laborator müayinələr zamanı 474 şəxsə aid sümük qalıqlarında müxtəlif həyati xəsarətlər, o cümlədən güllə və qəlpə yaralanmaları, eləcə də küt alətlə yetirilmiş xəsarətlər aşkar edilib.

Skelet qalıqlarının məhkəmə-tibbi müayinəsindən sonra şəxsiyyətin müəyyənləşdirilməsi məqsədilə müxtəlif nahiyələrdən, xüsusilə sağlam dişlərdən bioloji nümunələr götürülərək DTX-nin Genetik Araşdırmalar Mərkəzinə göndərilir.

Həsənov deyib ki, identifikasiya prosesi başa çatdıqdan sonra meyit qalıqları ailələrə təhvil verilir.

“İndiyədək 273 şəhidin meyit qalıqları Dövlət Komissiyasının tövsiyəsi və iştirakı ilə ailələrə təhvil verilib və milli-dini ənənələrə uyğun dəfn edilib”, - o bildirib.

Onun sözlərinə görə, dəfn edilənlərdən 225-i hərbçi, 48-i isə mülki şəxs olub.

Şəxsiyyəti müəyyənləşdirilmiş mülki şəxslər arasında 15 qadın və iki azyaşlı var.

Aytac Zeynalova