Emin Əmrullayev: Sertifikasiyadan keçməyən müəllimlərin böyük hissəsi ibtidai sinif müəllimləridir

Sertifikasiya nəticələrinə əsasən işdən azad edilən müəllimlərin böyük hissəsini ibtidai sinif müəllimləri təşkil edib. Bunu elm və təhsil naziri Emin Əmrullayev 2026 Peşə Təhsili Forumunda deyib.
Nazir bildirib ki, bu fakt ayrı-ayrı müəllimlərin nüfuzuna xələl gətirmək və ya onların bacarıqlarını kiçiltmək məqsədi daşımır.
Onun sözlərinə görə, ibtidai təhsil səviyyəsində dərs deyən müəllimlərin böyük hissəsi orta ixtisas təhsillidir. Bu vəziyyət uzun müddət ölkədə müəllim çatışmazlığı ilə əlaqədar formalaşıb.
Əmrullayev qeyd edib ki, artıq ibtidai və məktəbəqədər təhsil səviyyələrində tədrisin ali təhsilli müəllimlər tərəfindən aparılmasına keçilib.
Nazir bu dəyişikliyin uzunmüddətli perspektivdə təhsilin keyfiyyətinə müsbət təsir göstərəcəyinə inandığını bildirib.

























