3 min müəllim iş yerini dəyişmək üçün nazirliyə müraciət etdi

Ümumi təhsil müəssisələrində və peşə liseylərində müəllimlərin iş yerinin dəyişdirilməsi üzrə elektron ərizə qəbulu iyunun 10-da saat 23:59-da başa çatıb.

Təhsil Nazirliyinin mətbuat xidmətindən verilən məlumata görə, 10 gün davam etmiş elektron ərizə qəbulu dövründə 3216 nəfər (94 faiz) Azərbaycan bölməsi, 209 (6 faiz) nəfəri rus bölməsi olmaqla, 3425 nəfər müsabiqədə iştirak etmək üçün müraciət edib. Yerdəyişmə üçün müraciət edənlərin əksəriyyəti ibtidai sinif, Azərbaycan dili və ədəbiyyat, riyaziyyat, ingilis dili və tarix  müəllimləridir. Müsabiqədə iştirak etmək üçün müraciət edənlərdən 1303 nəfərin ərizəsi təsdiq olunub.

Ərizəsi ləğv edilənlər ümumtəhsil sistemində işləməyənlər, ümumtəhsil müəssisələrində müəllim vəzifəsində çalışmayan və ya müddətli müqavilə əsasında müəllim işləyən, həmçinin hazırda çalışdığı yerdə həvəsləndirmə tədbirləri tətbiq edilənlərdir.

Elektron ərizəsi qəbul olunmuş namizədlər iyunun 16-da Dövlət İqtisad Universitetinin 2-ci tədris binasında (ünvan: Bakı şəhəri, Həsən Əliyev küçəsi 135 – metronun "Gənclik” stansiyasının, Azərbaycan Müəllimlər İnstitutunun yaxınlığında) test imtahanında iştirak etməlidirlər. İmtahanda iştirak edərək yerdəyişmək hüququ qazanan müəllimlər üçün iyunun 17-də eyni ünvanda müsahibələr təşkil ediləcək.

www.miq.edu.az saytına daxil olmaqla qanunvericilik üzrə zəruri sənədlər, test suallarının cavablandırılması üçün təlimat, test nümunələri və müsahibə proqramı ilə tanış olmaq mümkündür.

Yerdəyişmə üzrə müsabiqə yekunlaşdıqdan sonra yenidən müəyyənləşdirilmiş vakant yerlərə müəllimlərin işə qəbulu üzrə elektron ərizə qəbulu iyulun 1-dən 15-dək aparılacaq.