Nazir tapşırıq verdi: “Elektron sənədləşmənin dairəsi genişləndirilsin”

"Cari ilin 9 ayı dövründə ədalət mühakiməsinin səmərəliliyinin artırılması, məhkəmə infrastrukturunun yenilənməsi üzrə tədbirlər uğurla davam olunaraq müasir tipli məhkəmə binalarında ölkə Prezidentinin Sərəncamı ilə yaradılan "elektron məhkəmə" informasiya sisteminin sınaq rejimində tətbiqinə başlanılıb".

 

 "ICTnews.az" elektron xəbər xidmətinin məlumatına görə, bu fikirlər Ədliyyə Nazirliyinin kollegiya iclasında səsləndirilib.

 

  Dövlət başçısı cənab İlham Əliyevin oktyabrın 12-də Nazirlər Kabinetinin 2015-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında verdiyi tapşırıqlar Ədliyyə Nazirliyinin kollegiyasında struktur qurumların rəhbərlərinin iştirakı ilə müzakirə olunaraq nazirliyin 9 ayda fəaliyyətinin yekunları təhlil edilib. Kollegiyada qeyd edilib ki,ölkədə elektron quruculuq istiqamətində atılan addımlara dəstək olaraq yeni inşa edilən, eyni zamanda təmir edilən inzibati binalarda informasiya-kommunikasiya texnologiyalarının tələbləri gözlənilir, binalar "elektron məhkəmə" sisteminin işləməsi üçün lazım olan vəsaitlərlə təmin edilir.

 

Qeyd olunub ki, Bakı və Şəkidə möhtəşəm məhkəmə komplekslərinin tikintisi başa çatdırılıb, 9 məhkəmə üçün binaların inşası davam etdirilir. Onların hər biri müasir tələblərə cavab verməklə elektron məhkəmə sisteminə öz töhfəsini verəcəkdir.

 

İclasda, həmçinin vurğulanıb ki, elektron xidmətlər, elektron hökümət vətəndaş məmnunluğuna yönələn fəaliyyət kimi cəmiyyətimizdə böyük rəğbətlə qarşılanır və beynəlxalq aləmdə hədsiz maraq doğurur.

Nazir Fikrət Məmmədov dövlət başçısının Nazirlər Kabinetinin iclasında maliyyə intizamının gücləndirilməsi, izafi xərclərə yol verilməməsi, büdcə vəsaitindən qənaətlə istifadə edilməsi, korrupsiya ilə mübarizənin daha da gücləndirilməsi, bu sahədə ictimai nəzarətin genişləndirilməsi, eləcə də ölkədə dayanıqlı inkişafın təmin olunmasında mühüm rol oynayan sahibkarlığın inkişafına süni maneələrin aradan qaldırılması və sahibkarlar qarşısında əsassız tələblərin qoyulmaması, yoxlamaların tənzimləmə mexanizmlərinin hazırlanması, yoxlamaların və lisenziyaların sayının kəskin şəkildə aşağı salınması barədə qəti tapşırıqlarını diqqətə çatdıraraq ədliyyə orqanlarının qarşısında duran vəzifələrin ölkə rəhbərinin tələbləri səviyyəsində qurulmasını tapşırıb.

İclasda sahibkarların hüquqlarının müdafiəsi, yoxlamaların azaldılması və bu sahədə əlavə təsirli mexanizmlərin müəyyən edilməsi, lisenziyaların sayının aşağı salınması və prosedurların daha da sadələşdirilməsi, məsuliyyət tədbirlərinin gücləndirilməsi üçün qanunvericiliyə yenidən baxılması, maarifləndirilmə tədbirlərinin və metodiki köməkliyin göstərilməsi işinin genişləndirilməsinin vacibliyi vurğulanıb.

 

Həmçinin qeyd olunub ki, sahibkarlıq sahəsində yoxlamaların aparılması üzrə reyestrdəki məlumatların təhlilinə əsasən əvvəlki illərə nisbətən cari ildə yoxlamaların sayı artıb, bu zaman bəzən müvafiq qanunvericiliyin tələblərinə dürüst əməl olunmur, sahibkarların maraqlarının qorunması sahəsində qüsurlara yol verilir.

 

Bununla əlaqədar reyestrin aparılması işinin səmərəsinin artırılması, o cümlədən yoxlamaların qeydə alınmasında və keçirilməsində şəffaflığın və hesabatlılığın təmin edilməsi məqsədilə reyestrin fəaliyyətində yeni proqram təminatının və qeydiyyat prosesinin tətbiqinin sürətləndirilməsi, habelə elektron sənədləşmənin dairəsinin genişləndirilməsi barədə və digər konkret tapşırıqlar verilib.