Bazarda qiymətlər optimallaşdırılır – VİDEO

Yerli istehsal müəssisələri qiymətlərin ən münasib variantı üzərində işləyir. 

ANN.Az Xəzərxəbər-ə istinadən xəbər verir ki, məqsəd devalvasiyanın yerli bazara təsirini minimuma endirməkdır.

Əgər hər hansi bir məhsul ölkədə istehsal olunursa onun qiymətindəki artım heç bir halda xaricdən gətirilən məhsullarla eyni ola bilməz. Yerli istehsal müəsisələrinin rəhbərləri də bu fikirdədirlər. 

Çünki istehsalda istifadə edilən hər hansı bir xammalın xaricdən gətirilməsi  böyük miqdarda  artıma səbəb ola bilməz. Metal konstruksiyaların istehsalı ilə məğul olan şirkətin rəhbəri  hesab edir ki, istehsal prosesində istifadə olunan xarici məhsulları maya dəyərində müəyyən çəkisi olsa digər xərclər manatla hesablanır. Yəni  nəticədə xaricdən gətirilən eyni məhsulla arada xeyli fərq olur.

Elə yeyinti, habelə kosmetik vasitələr istehsal edən yerli şirkətin rəhbəri də bu fikirdədir. Onun sözlərinə görə, ərzaq məhsulları ilə müqayisədə kosmetik vasitələrdə xarici məhsullardan daha çox istifadə olunur.

Sahibkarların sözlərinə görə, onlar qiymətlərin  daha çox artmaması üçün bəzi tədbirlər görürlər. Çünki qiymətlərin birdən-birə artımı bir çox faktorlara təsir edə bilər.

Sahibkarlar deyir ki, gələcəkdə xaricdən gətirilən xammalın ölkə daxilində istehsalı prespektivləri nəzərdən keçirilir. Belə olan halda həm yeni iş yerləri açılar, həm də xaricdən asılılıq aradan qaldırılar. Bu isə qiymətlərə öz təsirini göstərər.