"Elektron imza"dan istifadə sayı 13 milyonu ötdü

Cari ilin 1 iyun tarixinədək olan statistikaya əsasən, bu günə qədər dövlət qurumları üzrə 59 100, fiziki şəxslər üzrə 16 120, hüquqi şəxslər üzrə isə 15 310 "elektron imza" sertifikatı istifadəyə verilib.

Trend Məlumat Hesablama Mərkəzinə istinadən məlumat verir ki, ümumilikdə, bu günə qədər Milli Sertifikat Xidmətləri Mərkəzinin təqdim etdiyi "e-imza" sertifikatlarının sayı 90 530-a çatıb.

Məlumat üçün bildirək ki, 2016-cı ilin may ayı ərzində istifadəyə verilən "elektron imza" sertifikatının sayı 2792 təşkil edib. Onlardan dövlət qurumları üzrə 2318, fiziki şəxslər üzrə 46, hüquqi şəxslər üzrə isə 428 "e-imza" sertifikatı istifadəyə verilib.

Onu da qeyd edək ki, "Elektron hökumət" portalının autentifikasiya vasitələrindən biri sayılan "elektron imza" vasitəsilə 1 iyun 2016-cı il tarixədək həyata keçirilən sənəd imzalama və autentifikasiya tranzaksiyalarının toplam sayı dövlət qurumları tərəfindən 11 095 046, hüquqi və fiziki şəxslər tərəfindən isə 2 411 725 olmaqla ümumən 13 506 771 olub.