"Rəqabət təhdid yox, töhfə olacaq" - Direktor

ANN.Az xəbər verir ki, bunu "Caspian Energy Forum 2017-nin Ələt qəsəbəsində  Azad Ticarət Zonasının yaradılması və gələcəkdə istifadəsi" adlı tədbirdə jurnalistlərə açıqlamasında "Bakı Beynəlxalq Dəniz Ticarət Limanı” Qapalı Səhmdar Cəmiyyətinin baş direktoru Taleh Ziyadov deyib.

"Ələt ərazisində yeni limanın tikinti işləri qrafik üzrə davam etdirilir. Prezident İlham Əliyevin göstərişinə əsasən, gələn ilin sonuna qədər birinci mərhələdə nəzərdə tutulmuş bütün işlər tamamlanacaq. "Bərə" terminalının tikintisi 2014-cü ilin sentyabrında bitib. Növbəti mərhələdə böyük tırlar üçün nəzərdə tutulan "Roro” adlandırılan terminalın tikintisi başa çatacaq. Daha sonra konteyner, quru yük və digər terminallar üzrə işlər yekunlaşacaq. Ümumi işlərin 65-70%-i başa çatıb”. 

T.Ziyadov qeyd edib ki, İlham Əliyevin 17 martda imzaladığı sərəncama uyğun olaraq, limanın hüquqi rejimi üzrə işlər başa çatıb və tezliklə hökumətə təqdim ediləcək. Eyni zamanda, texniki əsaslandırma işləri davam etdirilir. Parlamentin növbəti sessiyasında bu məsələlər müzakirəyə çıxarılacaq. Hər zaman böyük dövlətlər bir-biri ilə rəqabət aparıb. 

"Hər bir şəhərin xüsusi ixtisaslaşdığı istiqamət var. Gələcəkdə də bu cür rəqabət olacağına inanırıq. Lakin bu rəqabəti təhdid kimi yox, yük daşınmalarına töhfə verəcək layihə olacaq. Düzgün siyasət aparıldıqdan sonra Bakı bütün liman şəhərlərinin mərkəzinə çevriləcək”.