Apreldə ən çox ixrac olunan məhsullar məlum oldu – SİYAHI

Anews.az Fins.az-a istinadən xəbər verir ki, bu barədə İqtisadi İslahatların Təhlili və Kommunikasiya Mərkəzinin may ayı üçün icmalında məlumat verilib. 

Bildirilib ki, aprel ayı üzrə ixrac olunan əsas mallar bunlardır: qızıl, təzə və ya soyudulmuş tomat, kimya sənayesi məhsulları, elektrik enerjisi, fındıq, pambıq lifi, şəkər, alüminium, xurma, alma və s. 

Aprel ayında qeyri-neft məhsullarının ixrac edildiyi ölkələrin siyahısında ilk beşlikdə Rusiya, Türkiyə, İsveçrə, Gürcüstan və İtaliya qərarlaşıb. 

Qeyd edək ki, 2017-ci ilin 4 ayı ərzində isə qeyri-neft sektoru üzrə ixrac 2016-cı ilin eyni dövrü ilə müqayisədə 22% artıb. Bu ixrac əməliyyatlarında 846 şirkət iştirak edib.

2017-ci ilin ilk 4 ayında qeyri-neft məhsullarının ixrac edildiyi ölkələrin siyahısında ilk beşlikdə Rusiya, Türkiyə, Gürcüstan, İsveçrə və Türkmənistan var. Onlardan Rusiya və Türkiyəyə ümumilikdə 100 milyon ABŞ dollarından çox qeyri-neft məhsulları ixrac edilib. 

4 aylıq məlumatların təhlilindən aydın olur ki, qeyri-neft sektoru üzrə ixracda ilk yeri xüsusi kütləsi 0,94-dən az olan ilkin formalı polietilen tutur. Bu müddətdə həmin məhsul 34,1 milyon ABŞ dolları həcmində ixrac olub. 

İkinci yerdə isə təzə və ya soyudulmuş tomat qərarlaşıb - 33,8 milyon ABŞ dolları həcmində. İxrac həcmi 28 milyon ABŞ dolları olan qabığı təmizlənmiş fındıq isə 3-cü yerdədir.