Mənşə sənədinin alınması proseduru sadələşdirilib

İqtisadiyyat Nazirliyinin Mətbuat xidmətindən Trend-ə verilən məlumata görə, tədbirdə 50-dən çox sahibkarlıq subyektinin nümayəndəsi iştirak edib.

Seminarda ixracın stimullaşdırılması istiqamətində kompleks tədbirlərin həyata keçirildiyi vurğulanıb, "İstehlak Mallarının Ekspertizası Mərkəzi” MMC-nin və regional bölmələrin inzibati binalarında təşkil olunan "Açiq qapı” günləri barədə sahibkarlara ətraflı məlumat verilib.

Tədbir çərçivəsində "Mənşə ekspertizaların aparılması qaydaları və ixrac zamanı güzəştlərin tətbiqi” və "Laboratoriya xidmətləri” mövzularında keçirilmiş təqdimatlarda sahibkarlar malın ixrac proseduru və gömrük güzəştləri barədə məlumatlandırılıb. Bildirilib ki, mənşə sənədinin verilməsi prosedurunun sadələşdirilməsi məqsədilə İqtisadiyyat Nazirliyi tərəfindən elektron müraciət forması daha da təkmilləşdirilib, tələb olunan sənədlərin sayı hüquqi şəxslər üçün 9-dan 6-ya, fiziki şəxslər üçün isə 5-dən 4-ə endirilib. Azərbaycanda mənşə ekspertizası və malın mənşəyini təsdiq edən sənəd 1 gündən gec olmayaraq sahibkara təqdim edilir. İstər MDB məkanında, istərsə də əksər digər ölkələrdə malın mənşəyinin müəyyən edilməsi müddəti 3 gündən az deyil. Artıq 2 ildir ki, ölkədə qeyri-neft malları üçün ekspertiza xidmətlərinin tarifləri 30% aşağı salınıb. Qeyd edək ki, sahibkarlara mənşə sertifikatının alınması qaydaları barədə təlimatlar paylanılır.

Seminarda "İstehlak Mallarının Ekspertizası Mərkəzi” MMC-nin nəzdində fəaliyyət göstərən Mərkəzi qida və qeyri-ərzaq mallarının sınaq laboratoriyasının iş prinsipi, akkreditasiya sahələri, burada aparılan laborator müayinələr barədə məlumat tədbir iştirakçılarının diqqətinə çatdırılıb.