UNİBANK kapitalını artırdı

Eyni zamanda, Bakı Fond Birjasında UNİBANK tərəfindən faizli, sənədsiz adlı təmin edilməmiş ümumi nominal dəyəri 10 milyon dollar olan istiqrazın yerləşdirilməsi də yekunlaşıb.

Səhmlərin və istiqrazların yerləşdirilməsi nəticəsində UNİBANK-ın nizamnamə kapitalı 6 milyon manat artaraq 126 milyon manat, prudensial qaydalara uyğun məcmu kapital isə 22 milyon manat artaraq 66 milyon manata çatıb.

Nizamnamə kapitalının artımı ilə səhmdarların pay bölgüsündə də dəyişikliklər olub. Kapitallaşmanın ikinci mərhələsindən sonra yerli fiziki şəxs olan səhmdarların payı 45,74%, beynəlxalq maliyyə institutları olan DEG – Almaniya İnvestisiya Şirkətinin payı 25,99%, Avropa Yenidənqurma və İnkişaf bankının (AYİB) payı isə 18,49% təşkil edəcək.

Xatırladaq ki, bu il ərzində UNİBANK artıq ikinci dəfədir ki, kapitalını artırır. İyun ayında bankın nizamnamə kapitalı 49 milyon manat artırılmışdı.

Başa çatan yenidənkapitallaşma prosesi bankın gələcək uğurlu inkişafı üçün əlavə imkanlar yaradır.

UNİBANK 2015-ci il iqtisadi böhran və makroiqtisadi şokların neqativ nəticələrini səhmdarların dəstəyi ilə aradan qaldırmaqla, bütün itkiləri bərpa edərək, 2017-ci ili 2 milyon manat mənfəətlə başa vurub.

Bankın təsdiqlənmiş 3 illik strateji planına və maliyyə proqnozuna əsasən, UNİBANK 2018-ci ili 15 milyon manat mənfəətlə yekunlaşdırmağı planlaşdırır.

Azərbaycanın iki aparıcı özəl bankı – "MBANK” (1992) və "PROMTEXBANK”-ın(1994) 2002-ci ildə birləşməsi nəticəsində UNİBANK adı altında fəaliyyətini davam etdirən bank, ölkədə ən iri maliyyə təsisatlarından biridir. Öz maliyyə göstəricilərinə görə, UNİBANK ölkə bank sektorunun aparıcıları siyahısına daxildir. Bank müxtəlif mülkiyyət formasına və fəaliyyət istiqamətlərinə aid olan 950 minə yaxın korporativ və fərdi müştərilərə xidmət göstərir. Dünyanın nüfuzlu maliyyə qurumlarından olan Avropa Yenidənqurma və İnkişaf Bankı və "DEG” Almaniya İnvestisiya Şirkəti UNİBANK-ın səhmdarları sırasındadır. Bankın paytaxtda və regionlarda geniş xidmət şəbəkəsi mövcuddur. Bank 25 ildən artq fəaliyyəti dövründə uğurlu kommersiya fəaliyyəti və sosial layihələrdə iştirakına görə bir çox beynəlxalq və yerli təşkilatlar tərəfindən çoxsaylı mükafatlara layiq görülmüşdür.