Rusiyada inflyasiya rekord həddə çatıb - ROSSTAT

Bu, Rusiyanın Ukraynaya təcavüzü başlayandan bəri ilk inflyasiya məlumatıdır.

Rusiyanın Ukraynada başladığı hərbi əməliyyatlar fond bazarının və rublun məzənnəsinin çökməsinə, eləcə də yeni sanksiyalar dalğasına səbəb oldu. Rublun devalvasiyası ilə əlaqədar idxal  edilən malların, daha sonra isə Rusiya isthsalı olan məhsulların qiymətləri qalxdır. Həftə ərzində qiymətlər 2,2% artaraq 1998-ci ildən bəri qeydə alınmayan rekord həddinə çatdı. 

Yalnız martın ilk dörd günündə qiymətlər 1,2% artıb. Xüsusilə iri avadanlıq və avtomobillərin qiyməti kəskin  bahalaşıb. Rəsmi statistikaya  görə, bir həftə içində  Rusiya istehsalı olan yeni avtomobillər 17%, xarici avtomobillər 15% , televizorlar 15%, elektrik tozsoranlar 14,6%, smartfonlar isə 9,6% bahalaşıb.

Ərzaq qiymətləri də xeyli artıb. Məsələn, pomidorun qiyməti təxminən 8%, bananın qiyməti  7% artıb. Məhsullardan kələm, kök, alma, düyü, marqarin, duz, mal əti və digərləri də nəzərəçarpacaq dərəcədə bahalaşıb. Uşaq qidalarının qiyməti 2,4%, şəkərin qiyməti isə 3,3% yüksəlib. 

Rosstat dərmanların qiymətində də ciddi artım qeydə alıb, lakin agentlik yalnız bəzi dərmanların qiymətlərinə nəzər yetirib. Məsələn, Analgin 4,6%, Corvalol isə 4,5% bahalaşıb. Həftə ərzində uşaq bezləri,  diş pastası, tualet kağızı, paltaryuyan toz və kibrit 1-2% bahalaşıb. Türkiyəyə səfərlərin orta qiyməti 28,7% artıb.

Əslində, bu məlumatlar hələ ki, digər amillərin təsirini əks etdirmir, məsələn, son bir həftə ərzində dünyanın ən böyük şirkətləri Rusiyada fəaliyyətini dayandırıb və ya tamamilə imtina ediblər. Bu, artıq Rusiyada istehsal olunan malların qiymətinin daha da artmasına səbəb olmalıdır. Bundan əlavə, rubl ucuzlaşmaqda davam edir. Devalvasiyanın artımı qiymətlərin bahalaşmasına təsir edən əsas amillərdəndir.