“Azərkosmos”un bu ilin birinci rübündə gəliri $6 milyonı ötüb

2022-ci ilin yanvar-martında "Azərkosmos”un peyklərin kommersiya istismarından əldə etdiyi gəlir 6,2 milyon dollar təşkil edib ki, bu da 2021-ci ilin birinci rübü ilə müqayisədə 58,5% azdır. Bu barədə  İqtisadi İslahatların Təhlili və Kommunikasiya Mərkəzi məlumat verib.  

Birinci rüb ərzində şirkət 31 ölkəyə peyk telekommunikasiya və optik peyk xidmətləri ixrac edib. Hesabat dövründə şirkətin xidmətlərinin əsas hissəsi Böyük Britaniya (1,6 milyon dollar), Fransa (1,1 milyon dollar), Lüksemburq (1,1 milyon dollar), BƏƏ (0,6 milyon dollar) və Pakistanın (0,4 milyon dollar) payına düşüb.

Hesabat dövründə "Azərkosmos”un ümumi gəlirlərinin 86%-ni xidmət ixracından əldə edilən gəlirlər təşkil edib.

2021-ci ildə "Azərkosmos”un peyklərin kommersiya istismarından əldə etdiyi gəlirlər 45,3 milyon dollar təşkil edib ki, bu da 2020-ci illə müqayisədə 0,4% çoxdur.

"Azerspace-1” peyki 2013-cü il fevralın 9-da Kuru kosmodromundan  orbitə buraxılıb.

2014-cü ilin dekabrında "Azərkosmos” və Fransanın "Airbus Defence and Space” şirkəti "Azersky” peykinin "Azərkosmos”un mülkiyyətinə verilməsi haqqında müqavilə imzalayıb. Peyk 2014-cü ilin iyununda orbitə çıxarılıb və 12 il orbitdə qalacaq.

Azərbaycan 2018-ci ilin sentyabrında Kuru kosmodromundan "Azerspace-2” telekommunikasiya peykini orbitə çıxarıb.

"Azərkosmos” 2010-cu ildə yaradılıb. Onun funksiyalarına peyklərin orbitə çıxarılması, telekommunikasiya xidmətlərinin göstərilməsi, xidmətlərin alınması üçün sığorta şirkətlərinin seçilməsi, kosmik (peyk) operatorları ilə əməkdaşlığın qurulması və bu istiqamətdə müxtəlif tədqiqatların aparılması daxildir.


N.Təbrizli

www.anews.az