Neft Fondu qiymət fərqindən 2 milyard dollar qazanıb

Azərbaycan Respublikası Dövlət Neft Fondunun (SOFAZ) büdcəsində ötən il xam neftin ixrac qiyməti 100 dollar götürüldüyü halda, il ərzində satılmış mənfəət neftinin orta satış qiyməti 109,1 dollar, xalis daxilolma qiyməti isə 101,1 dollar təşkil edib.Trend xəbər verir ki, bu barədə Nazirlər Kabinetinin 2013-cü ilin yekunları ilə bağlı Milli Məclisə təqdim etdiyi hesabatda qeyd olunub.Xam neftin hasilatı və qiyməti ilə bağlı fərq mənfəət neftinin satışından 1 937 milyon manat əlavə gəlirlərin SOFAZ-a daxil olmasına şərait yaradıb.SOFAZ 2013-cü ildə “Azəri-Çıraq-Günəşli” neft-qaz yataqları blokundan hasil edilmiş mənfəət neftinin satışından 16,26 milyard dollar gəlir əldə edib. Yatağın təsdiq edilmiş neft ehtiyatları 1 milyard ton qiymətləndirilir. Blokun tərkibində işlənən digər yataqlardan mənfəət neftinin satışından əldə olunan gəlirlər 62,7 milyon dollar olub.2013-cü ildə SOFAZ və xarici şirkətlərin birgə işlədiyi “Şahdəniz” qaz-kondensat yatağından hasil edilmiş mənfəət qazının satışından SOCAR-a 383,8 milyon dollar daxil olub. “Şahdəniz” yatağının təsdiq edilmiş qaz ehtiyatları 1,2 trilyon kubmetrdir.2013-cü ildə Azərbaycanın payına düşən karbohidrogenlərin satışından SOFAZ-a 16,7 milyard dollar daxil olub.2014-cü il yanvarın 1-nə olan məlumata görə, SOFAZ-ın aktivləri 35 877,5 milyon dollar olub.ANN.Az