TAP AG 2026-cı ilə qədər qaz kəmərinin emissiyalarını 5 % azaldacaq

TAP AG boru kəməri şirkəti bu illin sonunadək Trans-Adriatik Qaz Boru Kəmərinin (TAP) fəaliyyətindən yaranan istixana qazı emissiyalarını 5 % azaltmağı planlaşdırır.

Bu barədə şirkətdən məlumat verilib.

"Dekarbonizasiya hədəflərinə sadiqliyimiz çərçivəsində biz öz əməliyyatlarımızda 2050-ci ilə qədər iqlim neytrallığına nail olmağa çalışırıq. Əsas diqqətimizi qısa, orta və uzunmüddətli perspektivdə istixana qazı emissiyalarının azaldılmasında ən böyük təsir göstərən təşəbbüslərə, həmçinin enerji səmərəliliyini artıran tədbirlərə yönəldirik", - TAP AG-dən bildirilib.

Şirkətin məlumatına görə, TAP-ın karbon qazı emissiyalarının 90 %-dən çoxu qaz kompressorlarının işi ilə bağlıdır. Bildirilib ki, bu kontekstdə mövcud və gələcək kompressor stansiyalarında yeni elektrik kompressorlarının quraşdırılması imkanı nəzərdən keçirilir.

"2022-2025-ci illər üçün karbon idarəetmə planımız cari ilin sonuna qədər qısamüddətli hədəfləri nəzərdə tutur, Buraya TAP-ın istixana qazı emissiyalarının proqnozla müqayisədə 5 %, metan emissiyalarının 8 % azaldılması, həmçinin 2021-ci ildə sızmaların aşkarlanması və aradan qaldırılması kampaniyasının nəticələri ilə müqayisədə qeyri-mütəşəkkil (fugitiv) emissiyaların 54 % azaldılması daxildir", - TAP AG-dən bildirilib.

Şirkət həmçinin qeyd edib ki, ötən il TAP AG illik proqnozla müqayisədə ümumi istixana qazı emissiyalarını təxminən 20 %, metan emissiyalarını isə təxminən 58 % azaltmağa nail olub.

Xatırladaq ki, Trans-Adriatik Boru Kəmərinin tikintisi 2020-ci ilin oktyabrında başa çatıb. TAP-ın ümumi uzunluğu 878 km-dir ki, bunun da 550 km-i Yunanıstanın şimal hissəsindən, 215 km-i Albaniya ərazisindən, 105 km-i Adriatik dənizinin dibi ilə, 8 km-i isə İtaliya ərazisindən keçir. Azərbaycan qazının TAP vasitəsilə İtaliya, Yunanıstan və Bolqarıstandakı istehlakçılara tədarükünə 2020-ci il dekabrın 31-dən başlanılıb.

Azərbaycan və Avropa İttifaqı arasında əldə edilən razılaşmaya əsasən, 2027-ci ilə qədər Azərbaycan qazının tədarükü ildə azı 16 milyard kubmetrə çatmalıdır. TAP-ın genişləndirilməsinin birinci mərhələsi çərçivəsində İtaliya 1 milyard kubmetr, Albaniya isə 200 milyon kubmetr Azərbaycan qazı alacaq.

İndiyədək TAP vasitəsilə Azərbaycandan Avropaya 45,6 milyard kubmetr qaz tədarük edilib.