TAP vasitəsilə Azərbaycan qazının Avropaya gündəlik nəqli azalıb

Azərbaycan təbii qazını Avropaya nəql edən Trans-Adriatik Boru Kəməri (TAP) üzrə 6 oktyabr tarixində Yunanıstanın Kipoi çıxış nöqtəsindən 379 milyon 981 min 291 kVt/saat həcmində qaz nəqli sifarişi qeydə alınıb. Bu, ötən həftənin bazar ertəsi ilə müqayisədə 0,002 % azalma deməkdir. 

TAP-ın rəsmi elektron platformasının məlumatlarına görə,  7–13 oktyabr tarixlərini əhatə edən sifarişlər Kipoi üzrə 331 milyon 019 min 866 kVt/saat təşkil edib. Bu isə 30 sentyabr tarixli göstəricidən 12,89 %, 1 oktyabrla müqayisədə isə 12,88 % azdır.

Digər çıxış nöqtələri üzrə də tədarük göstəriciləri aşağıdakı kimidir:

Yunanıstan, Komotini: 6–13 oktyabr tarixlərində günlük sifariş sabit olaraq 28 milyon 674 min 418 kVt/saat təşkil edib. Yunanıstan, Nea Mesimvria: eyni dövr üçün sifariş həcmi 30 milyon 346 min 301 kVt/saat olub — bu da əvvəlki həftə ilə müqayisədə dəyişməyib.

İtaliya, Melenduqno: 6 oktyabr tarixində 316 milyon 964 min 315 kVt/saat həcmində sifariş qeydə alınıb. Bu, 29 sentyabrla müqayisədə 0,63 % çoxdur. Lakin 7–13 oktyabr tarixləri üçün sifariş 271 milyon 999 min 147 kVt/saat olub ki, bu da əvvəlki dövrlə müqayisədə 14,05 % azalmaya uyğundur.

Trans-Adriatik Boru Kəməri (TAP), Azərbaycanın "Cənub Qaz Dəhlizi" layihəsinin Avropa seqmentini təşkil edir. Boru kəməri 2020-ci ilin oktyabrında istismara verilib və həmin ilin dekabrından etibarən İtaliya, Yunanıstan və Bolqarıstana kommersiya məqsədli qaz nəqlinə başlanılıb. TAP-ın ümumi uzunluğu 878 km-dir: 550 km Yunanıstandan, 215 km Albaniyadan, 105 km Adriatik dənizinin dibi ilə, 8 km isə İtaliya ərazisindən keçir.

Avropa İttifaqının Rusiya qazından asılılığı azaltmağa çalışdığı bir dövrdə, Azərbaycan qazı TAP vasitəsilə alternativ enerji mənbəyi rolunu oynayır. 

Aytac