Erkən pensiya qaydaları sadələşdirilib - Deputat prosesi izah edib

Azərbaycan Nazirlər Kabineti əmək pensiyalarının təyini və yenidən hesablanması qaydalarına dəyişiklikləri təsdiqləyib. Bu addım erkən pensiya hüququ olan minlərlə vətəndaş üçün prosedurları xeyli sadələşdirir. Bu barədə deputat Vüqar Bayramov öz sosial hesabında yazıb. 

Dəyişikliklərə əsasən, zərərli və ağır iş şəraitində çalışan vətəndaşlar əvvəlki kimi arayışların alınması ilə bağlı çətinliklərlə üzləşməyəcək. Əvvəllər müəssisə bağlandıqda iş stajını təsdiq edən sənədin əldə olunması mümkünsüz olurdu və bu, erkən pensiya hüququnun reallaşmasını gecikdirirdi.

Yeni qaydalarla həmin sənədlər təqdim olunmadıqda, vətəndaşın peşəsinin Nazirlər Kabinetinin “güzəştli şərtlərlə pensiya hüququ verən peşələr” siyahısına uyğunluğu əsas götürüləcək. Staj “Əmək və Məşğulluq” altsistemindəki əmək müqaviləsi qeydləri, əmək kitabçası və ya dövlət arxivi sənədlərinə əsasən tanınacaq.

Bayramovun sözlərinə görə, dəyişikliklər həmçinin qulluq əlavəsi alan və işləməyə davam edən şəxslərə daha əlverişli hesablanma metodu təqdim edir: əməkhaqqı və ya pensiya kapitalı əsasında hesablanan pensiya məbləğlərindən yüksək olanı seçiləcək. Bu isə bəzi vətəndaşlar üçün pensiya ödənişlərinin artımına səbəb olacaq.

Azərbaycan qanunvericiliyinə görə, zərərli və ağır sahələrdə azı 12 il 6 ay çalışan kişilər və 10 il çalışan qadınlar üçün pensiya yaşı 5 il azaldılır.

Gülnar Nazimqızı