SOCAR-ın Kulevi terminalı Aİ sanksiyalarına düşə bilər — əsas məqamlar

SOCAR-a məxsus Kulevi neft limanı və terminalı Rusiyaya qarşı hazırlanmaqda olan Avropa İttifaqınin 20-ci sanksiyalar paketinə daxil edilib. Bu barədə haqqin.az-a Azərbaycanın enerji sektorundakı mənbə məlumat verib.

Mənbənin sözlərinə görə, qərarın əsas səbəbi Gürcüstanda fəaliyyət göstərən yeni neft emalı zavodunda Rusiya neftinin emalı və bu xammaldan istehsal olunan məhsulların Kulevi terminalı vasitəsilə ixrac edilməsidir.

“Bu addım faktiki olaraq Tbilisiyə Rusiya neftindən imtina ilə bağlı açıq mesajdır”, —  mənbə bildirib.

Qeyd olunub ki, əsas amil qiymət faktorudur. Rusiya nefti Qara dəniz limanlarında bir barel üçün 37–40 dollar səviyyəsində təklif olunur ki, bu da Gürcüstan NQZ-si üçün cəlbedici qiymət sayılır. Halbuki, əvvəlki razılaşmalara baxmayaraq, müəssisə Azərbaycan neftini faktiki olaraq almamışdı.

SOCAR-ın Kulevi terminalının illik layihə gücü 10 milyon tona qədər neft, neft məhsulları və neft-kimya məhsullarının ötürülməsini nəzərdə tutur və bu obyekt regionun əsas logistika mərkəzlərindən biri hesab olunur.

20-ci sanksiyalar paketi Aİ-yə üzv ölkələr tərəfindən təsdiqləndikdən sonra qüvvəyə minəcək. Paket əsasən Rusiya neftinin dəniz yolu ilə daşınmasına əlavə məhdudiyyətlər və mövcud logistik yayınma mexanizmlərinin bağlanmasını hədəfləyir.

Avropa Komissiyasının sədri Ursula fon der Leyen bildirib ki, yeni sanksiyalar enerji, maliyyə və ticarət sektorlarını əhatə edir. Aİ-nin xarici siyasət üzrə ali nümayəndəsi Kaya Kallas isə tədbirlərin Rusiyanın iqtisadi və hərbi potensialını zəiflətməyə yönəldiyini vurğulayıb.

SOCAR hələlik məsələyə dair rəsmi mövqe açıqlamayıb.

N.Təbrizli