İİB Qrupu Azərbaycana 1 milyard dollardan çox vəsait ayırıb

1992-ci ildən İslam İnkişaf Bankı dövlət zəmanəti ilə 18 tamamlanmış və bir davam edən layihə üzrə Azərbaycana 1 milyard dollardan çox vəsait ayırıb. Azərbaycan və İslam İnkişaf Bankı Qrupu özəl sektorun maliyyələşdirilməsi, ticarətin maliyyələşdirilməsi, investisiya sığortası və infrastrukturun inkişafı sahələrində əməkdaşlığı genişləndirir. Bunu AZPROMO-nun icraçı direktoru Yusif Abdullayev Bakıda keçirilən İİB Qrupunun özəl sektor üzrə roadshow tədbirində bildirib.

Onun sözlərinə görə, tədbirin əsas məqsədi 2026-cı il iyunun 16-19-da Bakıda keçiriləcək İİB Qrupunun illik toplantıları və Özəl Sektor Forumu ərəfəsində bankın Azərbaycanın özəl sektoru ilə əlaqələrini gücləndirməkdir.

Abdullayev bildirib ki, tədbirə kənd təsərrüfatı, qida istehsalı, maliyyə, sığorta, tikinti, infrastruktur, logistika, enerji, İKT, istehsal, turizm, səhiyyə və konsaltinq sahələrində fəaliyyət göstərən 100-ə yaxın Azərbaycan şirkəti qatılıb.

O qeyd edib ki, Azərbaycan 1992-ci ildən İİB-nin üzvüdür.

Abdullayevin sözlərinə görə, ITFC Azərbaycanın özəl sektoruna 83 milyon dollardan çox kredit xətti ayırıb.

N.Təbrizli