SOCAR AÇG-də hasilatın sabit qalacağını, hətta arta biləcəyini gözləyir

SOCAR prezidenti Rövşən Nəcəf bildirib ki, yeni layihələr və texnologiyalar hesabına Azərbaycanın ən böyük neft yatağı olan Azəri-Çıraq-Günəşlidə (AÇG) hasilatın sabit saxlanılması, hətta artırılması mümkündür.

Nəcəf BP-nin Azərbaycan, Gürcüstan və Türkiyə üzrə regional prezidenti Cio Kristofolinin AÇG-də hasilatın azalmasının illik təxminən 3% təşkil etməsi ilə bağlı açıqlamasını şərh edərkən deyib ki, bu rəqəm yalnız mövcud quyuların göstəricilərinə əsaslanır.

“Əgər buna sərbəst qaz və Qordonun dünən bəhs etdiyi əlavə neft həcmlərini də əlavə etsək, azalmanın 3% olacağından danışmaq olmaz. Faktiki olaraq hasilat sabit qalacaq”, - Nəcəf Bakı Enerji Həftəsində bildirib.

Onun sözlərinə görə, yatağın gələcək göstəriciləri mövcud proqnozlardan daha yaxşı ola bilər.

“BP sabitlikdən danışır, mən isə hətta artıma ümid edirəm. Biz bu məsələ ilə bağlı hələ də müzakirələr aparırıq”, - SOCAR rəhbəri deyib.

Nəcəf vurğulayıb ki, yeni texnologiyalar, düzgün tərəfdaşlıq və dövlət dəstəyi sayəsində yetkin neft-qaz yataqları “ikinci həyat” qazana bilər.

“Düzgün yanaşma, düzgün texnologiyalar, düzgün tərəfdaşlıq və dövlət dəstəyi ilə belə aktivlər əvvəl gözləniləndən daha çox nəticə verə bilər”, - o qeyd edib.

N. Təbrizli