Azərbaycanın strateji valyuta ehtiyatları ÜDM-i ötüb - Mikayıl Cabbarov

Azərbaycanın strateji valyuta ehtiyatları 88 milyard dollara çataraq ölkənin ümumi daxili məhsulunu üstələyib. Bunu iqtisadiyyat naziri Mikayıl Cabbarov İİB Bakıda keçirilən illik toplantısında ibildirib.

Onun sözlərinə görə, ehtiyatlar ilin əvvəlindən 3,4%, illik müqayisədə isə 15% artıb və  bu göstərici dünyada ən aşağı dövlət borcu səviyyələrindən biri olmaqdan başqa  iqtisadi sabitlik, investor etimadı və uzunmüddətli inkişaf üçün möhkəm əsas yaradır.

Cabbarov qeyd edib ki, Azərbaycanın makroiqtisadi göstəriciləri beynəlxalq reytinq agentlikləri tərəfindən də tanınır. Fitch və Moody’s ölkəyə sabit proqnozla investisiya səviyyəli reytinq verib.

Nazirin sözlərinə görə, iqtisadiyyatın şaxələndirilməsi ölkənin investisiya gündəliyini getdikcə daha çox formalaşdırır.

Cabbarov deyib ki, Azərbaycan özəl sektorun inkişafına, neft-qaz sektorundan kənarda yeni imkanların yaradılmasına və müxtəlif sənaye sahələrində investisiya potensialının genişləndirilməsinə xüsusi önəm verir.

Onun sözlərinə görə, son illərdə aparılan ardıcıl islahatlar investisiyaların qorunmasını gücləndirib, prosedurları sadələşdirib, dövlət dəstəyinə çıxışı genişləndirib və dövlət-özəl tərəfdaşlığını təşviq edib. Bu prosesdə kiçik və orta biznesin inkişafına, maliyyəyə çıxışa, ixrac yönümlü artıma və sənaye şaxələndirilməsinə xüsusi diqqət yetirilir.

Nazir bildirib ki, hazırda qeyri-neft-qaz ixracının dəstəklənməsi üçün logistika və nəqliyyat xərclərinin qarşılanması, yerli məhsulların rəqabət qabiliyyətinin artırılması və yeni ixrac bazarlarına çıxışın asanlaşdırılması istiqamətində tədbirlər həyata keçirilir.

Bu tədbirlər daha səmərəli kredit zəmanəti və faiz subsidiyası mexanizmləri ilə tamamlanır. Nəticədə istehsal, logistika, kənd təsərrüfatı, xidmətlər, bərpa olunan enerji və rəqəmsal texnologiyalar investisiyalar üçün daha cəlbedici sahələrə çevrilir.

Cabbarov qeyd edib ki, investorlar üçün yalnız imkanların mövcudluğu deyil, həm də layihələrin sürətlə və səmərəli şəkildə həyata keçirilə biləcəyi platformalar vacibdir. Bu baxımdan Azərbaycan coğrafi mövqeyi, inkişaf etmiş bağlantıları və qonşu ölkələrlə açıq ticarət əlaqələrindən istifadə etməyə çalışır.

Nazir Ələt Azad İqtisadi Zonasını investorlar üçün mühüm platformalardan biri kimi qeyd edib. Onun sözlərinə görə, zona müasir infrastruktur, rəqabətli güzəştlər və əlverişli biznes şərtləri təklif edir, Bakı Beynəlxalq Dəniz Ticarət Limanının yaxınlığında yerləşir və Azərbaycanın Orta Dəhlizdəki mövqeyini gücləndirir.

Cabbarov bildirib ki, investorlara hüquqi təminat vermək məqsədilə hökumət zonada fəaliyyət göstərən şirkətlər üçün xüsusi hüquqi rejim müəyyən edən qanun qəbul edib.

Nazir əlavə edib ki, Qarabağ və Şərqi Zəngəzur iqtisadi rayonlarının bərpası və inkişafı da hökumətin əsas prioritetlərindəndir. Onun sözlərinə görə, məcburi köçkünlərin geri qayıtması üçün şəraitin yaradılması Azərbaycan üçün milli ideya xarakteri daşıyır.

Cabbarov İslam İnkişaf Bankının Azərbaycanın məcburi köçkün və qaçqınlarına uzun illər dəstək göstərdiyini xatırladıb. O bildirib ki, bank azad edilmiş ərazilərdə Qarabağ suvarma kanalının bərpası üçün xüsusi kredit ayıran ilk beynəlxalq maliyyə qurumu olub.

Nazirin sözlərinə görə, hökumət azad edilmiş ərazilərdə geniş vergi güzəştləri, müasir infrastruktur və dövlət dəstəyi ilə investisiyalar üçün cəlbedici rejim tətbiq edir. Hazırda həmin ərazilərdə iki böyük sənaye parkı fəaliyyət göstərir.

Cabbarov bildirib ki, oxşar güzəştli rejim Naxçıvan Muxtar Respublikasında da tətbiq olunur. O qeyd edib ki, Naxçıvan Türkiyə, İran və Ermənistanla həmsərhəd olması baxımından unikal coğrafi mövqeyə malikdir.

Nazir Azərbaycanın investisiya cəlbediciliyinin əsas üstünlükləri sırasında bağlantılar, yaşıl enerji və rəqəmsal hazırlığı göstərib. Onun sözlərinə görə, Azərbaycan beynəlxalq nəqliyyat dəhlizlərinin əsas qovşaqlarından biri kimi Şərq-Qərb bağlantısında, xüsusilə Orta Dəhliz boyunca rolunu gücləndirir.

Cabbarov bildirib ki, Azərbaycan Xəzər dənizi vasitəsilə Mərkəzi Asiyanın dənizə çıxışı olmayan ölkələri üçün təbii çıxış nöqtəsi kimi çıxış edir və müasir nəqliyyat, logistika və multimodal infrastrukturun inkişafına sərmayə qoymağa davam edir.

O əlavə edib ki, Naxçıvanla Azərbaycanın əsas hissəsi arasında bağlantını gücləndirəcək beynəlxalq sülh və rifah marşrutu Bakı şəhərinin Avropa ilə Asiya arasında regional logistika və tranzit mərkəzi kimi rolunu daha da artıracaq.

Nazir bildirib ki, bərpa olunan enerji gələcək investisiyalar üçün ən mühüm sahələrdən birinə çevrilib. Azərbaycan beynəlxalq və yerli investorlarla birlikdə Qara dəniz və Xəzər yaşıl enerji kabeli layihələri də daxil olmaqla regional təşəbbüsləri irəli aparır.

Cabbarovun sözlərinə görə, Azərbaycan enerji istehlakçılarına enerjini onların seçdiyi formada təqdim edən etibarlı təchizatçı olaraq qalacaq.

Nazir qeyd edib ki, ölkə iqtisadiyyatın rəqəmsal transformasiyasını sürətləndirmək, startapların inkişafını dəstəkləmək, kiçik və orta biznesin rəqəmsal bazarlara çıxışını genişləndirmək və milli rəqəmsal bacarıqları gücləndirmək məqsədilə kompleks rəqəmsal gündəlik həyata keçirir.

Cabbarov bildirib ki, Azərbaycanın gənc, yaxşı təhsilli və çevik insan kapitalı da investorlar üçün mühüm üstünlükdür. Onun sözlərinə görə, rəqəmsal transformasiya, istedad və innovasiya potensialının birləşməsi uzunmüddətli rəqabət qabiliyyəti axtaran investorlar üçün getdikcə daha vacib amilə çevrilir.

Nazir Azərbaycanın investorlara təqdim etdiyi əsas üstünlükləri makroiqtisadi sabitlik, güclü maliyyə ehtiyatları, siyasi proqnozlaşdırıla bilənlik, strateji bağlantılar, hazır investisiya platformaları, rəqabətli güzəştlər, inkişaf edən qeyri-neft sektorları və gənc, çevik işçi qüvvəsi kimi xarakterizə edib.

N.Təbrizli