IsDB Qrupunun strukturları Azərbaycan tərəfdaşları ilə $290 milyon çox dəyərində sazişlər imzalayıb

 İslam İnkişaf Bankı (IsDB) Qrupunun strukturları çərşənbə axşamı Azərbaycan tərəfdaşları ilə özəl sektorun və ticarətin maliyyələşdirilməsinə yönəlmiş ümumi dəyəri 290 milyon dollardan çox olan əməkdaşlıq və maliyyələşdirmə sazişləri imzalayıb.

Özəl Sektorun İnkişafı üzrə İslam Korporasiyası (ICD) ilə SOCAR arasında Azərbaycanda maliyyələşdirmə, investisiya və məsləhət xidmətləri sahəsində imkanların araşdırılmasına dair əməkdaşlıq sazişi imzalanıb. Sənədi SOCAR prezidenti Rövşən Nəcəf və ICD-nin baş icraçı direktorunun səlahiyyətlərini icra edən Xalid Əl-Abudi imzalayıb.

ICD və Azərbaycan Biznesin İnkişafı Fondu (ABDF) arasında 200 milyon manatlıq “vakala” çərçivə sazişi bağlanıb. Saziş maliyyə institutlarına özəl sektorun maliyyələşdirilməsi üçün milli valyutada kredit xətlərinin ayrılmasını nəzərdə tutur.

ICD həmçinin Türk İnvestisiya Fondu ilə 50 milyon dollarlıq çərçivə agentlik sazişi və Azerconnect Group ilə 20 milyon dollarlıq birbaşa maliyyələşdirmə mandatı imzalayıb.

Bundan əlavə, ICD ilə TuranBank arasında özəl sektorun maliyyələşdirilməsini genişləndirmək məqsədilə 15 milyon dollarlıq kredit xəttinin açılmasına dair niyyət memorandumu imzalanıb.

Ayrıca, Beynəlxalq İslam Ticarətinin Maliyyələşdirilməsi Korporasiyası (ITFC) ilə RabitaBank arasında 10 milyon dollarlıq maliyyələşdirmə sazişi bağlanıb.

N.Təbrizli