Azərbaycanda 2027-ci il üçün inflyasiya proqnozu açıqlanıb

Azərbaycan hökuməti 2027-ci ildə ölkədə orta illik inflyasiyanın 5,3% təşkil edəcəyini proqnozlaşdırır.Bu barədə Maliyyə Nazirliyinin 2027-ci il üzrə büdcə göstəricilərində qeyd olunub.

Proqnoz İqtisadiyyat Nazirliyi tərəfindən cari ilin ötən dövründəki faktiki inflyasiya göstəriciləri, dünya əmtəə, o cümlədən ərzaq qiymətlərindəki dəyişikliklər, onların idxal qiymətlərinə təsiri, nominal effektiv məzənnə indeksinin dinamikası, manatın məzənnəsinin sabit qalacağı fərziyyəsi, eləcə də tənzimlənən mal və xidmət tariflərindəki dəyişikliklər nəzərə alınmaqla hazırlanıb.

İqtisadiyyat Nazirliyi 2026-cı ildə Azərbaycanda orta illik inflyasiyanın 5,7% təşkil edəcəyini gözləyir.

Dövlət Statistika Komitəsinin məlumatına görə, 2026-cı ilin yanvar-avqust aylarında istehlak qiymətləri ötən ilin eyni dövrü ilə müqayisədə 5,7% artıb.

Avqust ayında istehlak qiymətləri illik ifadədə 5,7%, aylıq ifadədə isə 0,2% yüksəlib.