VNG Azərbaycan qazının idxalını artırmaq istəyir

Almaniyanın VNG AG enerji şirkəti Azərbaycandan təbii qaz idxalının həcmini artırmaq niyyətindədir və uzunmüddətli tədarük imkanlarını nəzərdən keçirir, şirkətin baş vitse-prezidenti Oliver Hill çərşənbə axşamı bildirib.

Hill Bakıda keçirilən Almaniya-Azərbaycan Strateji Tərəfdaşlıq və Bağlantılar Konfransında deyib ki, VNG Azərbaycandan qaz idxalına bu ilin əvvəlindən başlayıb.

“İlkin mərhələdə bunlar nisbətən kiçik həcmlərdir, bu, ilk addımdır. Biz həmin həcmləri artırmaq istərdik. Bu, məqsədlərimizdən biridir və əməkdaşlığımızın əsas istiqamətlərindən biridir”, - Hill bildirib.

Onun sözlərinə görə, VNG və Azərbaycanın dövlət neft şirkəti SOCAR bir neçə gün əvvəl həm təbii qazın Avropaya tədarükünü, həm də enerji keçidi sahəsində əməkdaşlığı nəzərdə tutan uzunmüddətli tərəfdaşlıq barədə razılığa gəliblər.

Hill bildirib ki, VNG 15-20 illik dövrü əhatə edən uzunmüddətli tədarük əməkdaşlığına açıqdır.

O əlavə edib ki, uzunmüddətli perspektivdə tərəflər hidrogen və biometan da daxil olmaqla, karbonsuzlaşdırılmış enerji mənbələrinin Azərbaycandan Avropaya tədarükü imkanlarını inkişaf etdirməyi nəzərdən keçirirlər.

N. Təbrizli