Azərbaycan-Niderland ticarət dövriyyəsi 325 milyon dollar olub

2025-ci ildə Azərbaycanla Niderland arasında ticarət dövriyyəsi 325 milyon ABŞ dolları təşkil edib. Bunu Azərbaycanın xarici işlər naziri Ceyhun Bayramov deyib.

Onun sözlərinə görə, bu göstərici iki ölkənin iqtisadi potensialını tam əks etdirmir və iqtisadi əməkdaşlığın genişləndirilməsi üçün imkanlar mövcuddur.

Bayramov qeyd edib ki, qarşılıqlı investisiyaların həcmi də daha yüksək göstəricilərə nail olmaq üçün potensialın olduğunu göstərir.

Nazir bildirib ki, Azərbaycan və Niderland arasında 2026–2028-ci illəri əhatə edən, əməkdaşlığın demək olar ki, bütün istiqamətlərini nəzərdə tutan yol xəritəsi hazırlanıb. Sənədin qəbul edilməsi ikitərəfli münasibətlərdə növbəti mühüm irəliləyiş kimi qiymətləndirilib.

O əlavə edib ki, gələn il iki ölkə arasında diplomatik münasibətlərin qurulmasının 35-ci ildönümü qeyd olunacaq.

Bayramovun sözlərinə görə, hazırda Azərbaycan və Niderland arasında 11 saziş mövcuddur, daha 4 saziş üzrə isə işlər davam etdirilir. Bu sənədlər də siyasi məsləhətləşmələr zamanı müzakirə olunub.

Aytac