Akif Quliyev: Su anbarlarında ehtiyatlar ötən illə müqayisədə 2,2 milyard kubmetr artıb

Azərbaycanda su anbarlarında ötən ilin müvafiq dövrü ilə müqayisədə 2,2 milyard kubmetr artıq su toplanıb. Bunu Azərbaycan Dövlət Su Ehtiyatları Agentliyinin rəsmisi Akif Quliyev bildirib.

Onun sözlərinə görə, Azərbaycan su ehtiyatları baxımından risk qrupuna daxil olan ölkələrdəndir. Ölkənin su resurslarının təxminən 70%-nin transsərhəd çaylar hesabına formalaşması su ehtiyatlarının idarə edilməsini xüsusi əhəmiyyətli edir.

Quliyev qeyd edib ki, Həkəriçay üzərində inşa edilən su anbarı çayın Azərbaycan ərazisində formalaşması və suyun ekoloji vəziyyətinin yaxşı olması nəzərə alınaraq içməli su təchizatı məqsədilə nəzərdə tutulub.

Agentlik rəsmisi bildirib ki, Azərbaycanın ən böyük su anbarı olan Mingəçevir su anbarında da su ehtiyatlarının toplanması davam edir. 

Onun sözlərinə görə, hazırda respublika üzrə 144 su anbarı mövcuddur. Bu anbarlardan həm içməli su təchizatında, həm də suvarma məqsədilə istifadə olunur.

Akif Quliyev əlavə edib ki, hazırda su ehtiyatları ilə bağlı hər hansı təhlükə müşahidə edilmir. 

Aytac